ᓴᓇᓂᕐᒥ ᐅᐊᖕᓇᖅ-ᓂᒋᖅ ᓇᖕᒥᓂᖃᕐᓂᖅ ᐃᑳᕐᕕᒃ

ᓄᓇᕗᑦ ᑲᓇᑕᒥ ᓱᒃᑲᓂᖅᐹᖑᔪᖅ ᑮᓇᐅᔾᔭᓂᕐᒧᑦ ᐱᕈᖅᐸᓪᓕᐊᔪᖅ, ᐊᑐᐃᓐᓇᐅᑎᑦᑎᔪᖅ ᐊᒥᓱᓂ ᐱᕕᖃᕐᓂᐅᔪᓂ ᐱᕈᖅᐹᓪᓕᓂᕐᒧᑦ ᑲᓲᒪᖃᑎᖃᕐᓂᒃᑯᑦ ᓇᖕᒥᓂᕆᔭᐅᔪᓂ ᑲᓇᑕᓕᒫᒥ. ᑐᓴᖅᑕᐅᕙᓪᓕᐊᔪᑦ ᑕᐅᑐᓐᓂᖅᓴᐅᑎᓪᓗᒋ ᐅᔭᕋᖕᓂᐊᒐᒃᓴᓂ ᐊᒻᒪ ᐊᓯᖏᓐᓂ ᐱᕈᒃᑲᓐᓂᕈᓐᓇᙱᑦᑐᓂ ᐃᑲᔪᕈᑎᒃᓴᐅᔪᓂᑦ, ᐅᓄᖅᑐᑦ ᐊᓯᖏᑦ ᐊᑐᐃᓐᓇᐅᑎᑦᑎᓲᑦ ᐱᕕᖃᕐᓂᐅᔪᓂ ᑕᐃᒃᑯᓄᖓ ᐱᕙᒌᔭᖅᓯᒪᔪᓄᑦ ᐊᑑᑎᖃᑦᑎᐊᖅᑐᒥ, ᑐᓴᐅᒪᑦᑎᐊᖅᑎᑦᑎᓂᒃᑯᑦ, ᐊᒻᒪ ᑲᔪᓯᓂᖃᑦᑎᐊᖅᑐᒥ ᐊᒃᓱᕈᕐᓂᕐᒥ ᐃᓯᖅᐸᓪᓕᐊᓂᕐᒧᑦ ᖁᕕᐊᓇᖅᑐᒻᒪᕆᖕᒧᑦ ᑮᓇᐅᔭᓕᐅᕈᑎᒃᓴᒧᑦ.

ᒪᕐᕉᒃ ᑲᓇᑕᒥ ᐊᕕᒃᑐᖅᓯᒪᔪᑦ, ᓅᕙ ᓯᑰᓯᐊ ᐊᒻᒪ ᓂᐅᕙᓐᓛᓐ ᐊᒻᒪ ᓛᐸᑐᐊ, ᐃᓕᓴᖅᓯᓯᒪᔫᒃ ᑖᒃᑯᓂᖓ ᐱᕕᖃᕐᓂᐅᔪᓂ, ᐊᒻᒪ ᐅᕙᒍᑦ ᐃᑲᔪᖅᑐᑕ ᓇᓗᓇᐃᖅᓯᓂᕐᒥ ᐊᒻᒪ ᐋᖅᑭᒃᓱᐃᓂᕐᒥ ᑲᓲᒪᖃᑎᖃᕈᓐᓇᕐᓂᕐᒥ ᒐᕙᒪᖏᓐᓂ ᐊᒻᒪ ᓇᖕᒥᓂᕆᔭᐅᔪᓂ ᑕᐃᒃᑯᐊᓗ ᓄᓇᕗᒻᒦᑦᑐᑦ.

 

ᓄᓇᕗᒻᒥ ᑐᑭᓯᐅᒪᓂᖃᕐᓂᖅ

ᐱᒋᐊᕈᑎᖃᓚᐅᖅᑐᒍ ᐋᖅᑭᒃᓱᐃᓂᕐᒥ ᐊᒻᒪ ᑲᔪᓯᑎᑦᑎᓂᕐᒥ ᐅᓄᖅᑐᓂ ᐃᓕᓐᓂᐊᕈᑎᓂ ᖃᐅᔨᓇᓱᓐᓂᕐᒥ ᐊᔾᔨᒌᙱᑦᑐᓂ ᐊᑐᖅᑕᐅᔪᓂ ᓄᓇᕗᒻᒥ ᑮᓇᐅᔾᔭᒃᓴᐅᑎᖃᕐᓂᖓ ᐊᔾᔨᐅᙱᓐᓂᖓᓄᑦ – ᐱᓕᕆᕝᕕᓪᓗᐊᑕᖏᑦ, ᓄᓇᕘᑉ ᓄᓇᓕᖏᑦ ᐅᖓᓯᒌᓐᓂᖏᑦ ᐊᒻᒪ ᑎᑭᕝᕕᐅᖃᑦᑕᕆᐊᖃᕐᓂᖏᓐᓄᑦ ᖃᖓᑕᓲᒃᑯᑦ ᐅᒥᐊᕐᔪᐊᒃᑯᓪᓗ ᑲᓲᒪᓂᐅᔪᓄᑦ, ᐊᒥᒐᓗᕐᓂᖏᓐᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓲᕐᓗ ᖃᕋᓴᐅᔭᒃᑰᕈᑎᖃᕈᓐᓇᕐᓂᕐᒥ, ᐃᒡᓗᓕᕆᓂᖅ ᐊᒻᒪ ᐆᒻᒪᖅᑯᑎᖃᕐᓂᖅ, ᐊᓯᖏᓪᓗ ᐃᓱᒫᓘᑕᐅᔪᑦ. ᓴᖅᑭᓚᐅᕐᒥᔭᕗᑦ ᓄᓇᕘᑉ ᐊᔾᔨᐅᙱᑦᑐᒥ ᒐᕙᒪᓕᕆᓂᕐᒧᑦ ᐋᖅᑭᒃᓯᒪᓂᖓ, ᐅᑭᐅᖅᑕᖅᑐᒥ ᐊᕕᒃᓯᒪᔪᒥ ᒐᕙᒪᓖᑦ ᓇᖕᒥᓂᖅᓱᕈᓐᓇᕐᓂᕐᒧᑦ ᐱᓕᕆᐊᖃᓕᖅᑎᓪᓗᒋᑦ, ᐋᖅᑭᒃᓱᖅᑕᐅᓯᒪᓪᓗᓂ ᓄᓇᕗᒻᒥ ᓄᓇᑖᕐᓂᒃᑯᑦ ᐊᖏᕈᑎᒧᑦ ᐊᒻᒪ ᓄᓇᕗᑦ ᒪᓕᒐᖓᓄᑦ.

ᐱᓕᕆᖃᑎᒌᒃᑐᖁᑎᕗᑦ ᓴᖅᑮᓚᐅᖅᑐᑦ “ᓇᖕᒥᓂᖃᕐᓂᖅ ᓄᓇᕗᒻᒥ” ᐃᓕᓐᓂᐊᕈᑎᒃᓴᒥ ᓇᖕᒥᓂᖃᖅᑎᐅᔪᓄᑦ ᐊᒻᒪ ᒐᕙᒪᓕᕆᔨᐅᔪᓄᑦ ᕼᐊᓕᕚᒃᓯᒥ ᐊᒻᒪ ᓴᐃᓐ ᔮᓐᓯᒥ, ᓴᖅᑮᓚᐅᖅᑐᑦ ᐊᒃᓱᐊᓗᒃ ᖃᐅᔨᒃᑲᓐᓂᕈᒪᔪᓂ ᐊᒻᒪ ᐅᖃᐅᓯᖃᕐᓂᕐᒥ ᑲᑎᖃᑎᒌᑐᐃᓐᓇᕆᐊᓕᖕᓂ, ᓄᑖᓂ ᑲᑐᔾᔨᖃᑎᒌᓂᕐᒥ, ᐊᒻᒪ ᐊᑐᐃᓐᓇᐅᑎᑦᑎᓂᕐᒥ ᓱᓇᒃᑯᑖᓂ ᐱᔨᑦᑎᕋᐅᑎᓂᓪᓗ ᓄᑖᒥ ᐊᒻᒪ ᖁᕕᐊᓇᖅᑐᒻᒪᕆᖕᒥ ᓂᐅᕕᐊᒃᓴᐅᔭᖅᑐᓕᕐᓗᑎᒃ.

ᑭᖑᓪᓕᕐᒥ ᐊᓪᓗᕆᐊᕈᑎᒃᓴᐅᓚᐅᖅᑐᖅ ᐱᕙᓪᓕᐊᑎᑦᑎᓂᕐᒥ ᐸᕐᓇᐅᑎᓂ ᓂᐅᕕᐊᒃᓴᐅᔭᖅᑐᓕᕐᓗᑎᒃ ᐊᑐᓂ ᑲᓇᑕᒥ ᐊᕕᒃᑐᖅᓯᒪᔪᓂ ᑕᐃᒪᐃᑦᑐᒥ “ᐅᐸᓗᖓᐃᔭᖅᓯᒪᓂᒃᑯᑦ ᐃᓯᖅᐸᓪᓕᐊᓂᕐᒧᑦ ᐸᕐᓇᒍᑎ ᓄᓇᕗᒻᒧ” ᐱᕙᒌᔭᖅᑕᐅᓚᐅᖅᑐᖅ ᓅᕙ ᓯᑰᓯᐊᒧᑦ ᑭᒡᒐᖅᑐᐃᓪᓗᑎ ᓅᕙ ᓯᑰᓯᐊᑉ ᓇᖕᒥᓂᖃᕐᓂᕐᒧᑦ ᑲᑐᔾᔨᖃᑎᒌᒃᑯᖏᓐᓄᑦ (NSBI) ᐊᒻᒪ ᕼᐋᓕᕚᒃᓯᒥ ᓯᓚᕐᔪᐊᓕᒫᒧᑦ ᖃᖓᑕᓲᒃᑯᕕᐅᑉ ᐱᔪᓐᓇᕐᓂᖃᖅᑎᖏᑦ (HIAA); ᑖᒃᑯᐊ “ᒐᕙᒪᖏᑦ ᓂᐅᕙᓐᓛᓐᒥ ᓛᐸᑐᐊᒥᓪᓗ ᓄᓇᕗᒻᒥ ᐱᓕᕆᖃᑎᖃᕐᓂᕐᒧᑦ ᐅᐸᓗᖓᐃᔭᕐᓂᕐᒧᑦ” ᑎᑎᕋᖅᑕᐅᓚᐅᖅᑐᖅ ᒐᕙᒪᖓᓄᑦ ᓂᐅᕙᓐᓛᓐᒥ ᓛᐸᑐᐊᒥᓪᓗ (GNL), ᐱᓕᕆᕝᕕᖏᑦ ᓇᖕᒥᓂᖃᕐᓂᕐᒧᑦ, ᐳᓚᕋᖅᑐᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ ᐊᒻᒪ ᓄᓇᓕᕋᓛᖑᓂᖅᓴᐅᔪᓄᑦ ᐱᕙᓪᓕᐊᑎᑦᑎᓂᕐᒥᑦ ᑕᕆᐅᕐᒥᐅᑕᓕᕆᔾᔪᑎᓂ ᐊᒻᒪ ᐅᑭᐅᖅᑕᖅᑐᒥ ᐱᕕᖃᖅᑎᑕᐅᔪᓕᕆᔨᒃᑯᓐᓄ. ᑖᒃᑯᐊ ᐅᐸᓗᖓᐃᔭᐅᑏᑦ ᐊᑐᖅᑕᐅᓪᓗᑎ ᓯᕗᒧᐊᕈᑕᐅᓪᓗᑎ ᓂᐅᕕᐊᒃᓴᐅᔭᖅᑐᓕᕐᓗᑎᒃ ᐱᒋᐊᕈᑎᖃᕐᓂᕐᒧᑦ, ᑕᒪᕐᒥ ᐊᕕᒃᑐᖅᓯᒪᔪᑦ ᐅᖃᖃᑎᖃᖅᐸᓪᓕᐊᓚᐅᖅᑐᑦ ᐊᔾᔨᒌᙱᑐᓂ ᓇᖕᒥᓂᖃᖅᑎᐅᔪᓂ ᐊᒻᒪ ᑲᑐᔾᔨᖃᑎᒌᖑᔪᓂ ᓄᓇᕗᒻᒥ.

 

ᑲᓲᒪᖃᑎᖃᖅᐸᓪᓕᐊᓂᖅ

ᑕᒪᕐᒥᒃ ᐅᐸᓗᖓᐃᔭᐅᑎᑦ ᐊᒃᓱᐊᓗᒃ ᐊᔭᐅᕆᓚᐅᖅᑐᑦ ᐃᓚᐅᖁᔭᐅᓪᓗᑎ ᑲᓇᑕᒥ ᐊᕕᒃᑐᖅᓯᒪᔪᓂ ᓄᓇᕗᒻᒥ ᑐᙵᕕᒋᔭᐅᔪᓂ ᑕᐅᖅᓰᓂᕐᒧᑦ ᑲᑎᓐᓂᐅᔪᓂ, ᐃᓚᒋᓪᓗᓂᒋᑦ ᐃᖃᓗᓐᓂ ᓄᓇᕗᒻᒥ ᑕᐅᖅᓰᓂᕐᒧᑦ ᑲᑎᓐᓂᐅᔪᒥ ᐊᒻᒪ ᑲᑎᒪᓂᐅᔪᒥ (NTC) ᐊᒻᒪᓗ ᐊᖅᓴᕐᓃᑦ ᑕᐅᖅᓰᓂᕐᒧᑦ ᑲᑎᓐᓂᐅᔪᒥ ᐊᒻᒪ ᑲᑎᒪᓂᐅᔪᒥ (NLTC) ᐋᑐᐋᒥ. ᑎᓕᔭᐅᓯᒪᔪᑦ ᓅᕙ ᓯᑰᓯᐊᒥ ᐊᒻᒪ ᓂᐅᕙᓐᓛᓐ/ᓛᐸᑐᐊᒥ ᐅᐸᒍᑎᓚᐅᖅᑐᑦ ᑕᒪᒃᑮᓐᓄ ᑲᑎᓐᓂᐅᔪᓄᑦ, ᑖᒃᑯᐊ ᐅᑭᐅᖅᑕᖅᑐᒥ ᑕᐅᑐᒐᖓᒃᑯᑦ ᐊᑐᐃᓐᓇᐅᑎᑦᑎᓚᐅᖅᑐᑦ ᐃᓕᓐᓂᐊᖅᑎᑦᑎᓂᕐᒥᑦ ᓄᓇᓕᐅᔪᒥ ᐊᒻᒪ ᖃᓄᐃᓐᓂᐅᔪᒧᑦ; ᖃᐅᔨᑎᑦᑎᓪᓗᑎ ᐅᐸᒍᑎᔪᓂ ᐃᓚᐅᓪᓗᐊᑕᖅᑐᓄᑦ, ᐃᓱᒪᓕᐅᖅᑎᓄᑦ ᐊᒻᒪ ᓇᖕᒥᓂᖃᕐᓂᕐᒧᑦ ᑲᑐᔾᔨᖃᑎᒋᔭᐅᑐᐃᓐᓇᕆᐊᓕᖕᓂ; ᑲᑎᒪᓂᕐᒥ ᐋᖅᑭᒃᓱᐃᓂᕐᒥ ᐊᑐᐃᓐᓇᐅᑎᑦᑎᓂᕐᒥ ᓇᖕᒥᓂᖃᕐᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧ ᐅᖃᐅᔾᔨᒋᐊᕐᓂᕐᒥ; ᐊᒻᒪ ᐃᑲᔪᕐᓂᕐᒥ ᐋᖅᑭᒃᓱᐃᓂᕐᒥ ᐱᒋᐊᕐᖓᐅᑎᓂ ᐊᖏᕈᑎᓂ, ᐅᓄᖅᑐᑦ ᑲᔪᓯᓂᖃᑦᑎᐊᖅᓯᒪᔪᑦ ᑲᑐᔾᔨᖃᑎᒌᑦᑎᐊᕐᓂᕐᒧᑦ.

ᓯᕗᓪᓕᖅᐹᖑᖃᑕᐅᓚᐅᖅᑐᖅ ᖃᓄᐃᓕᖓᓕᕐᓂᖓᓂ ᑖᓐᓇᐅᓚᐅᖅᑐᖅ ᑐᑭᓯᐅᒪᖃᑎᒌᖕᓂᕐᒧᑦ ᑎᑎᕋᓕᐊᖑᓯᒪᔪᒧᑦ (MOU) ᒐᕙᒪᒃᑯᖏᓐᓂ ᓂᐅᕙᓐᓛᓐᒥ ᐊᒻᒪ ᓛᐸᑐᐊᒥ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓂ, ᓴᖅᑮᓚᐅᖅᑐᖅ ᐅᓄᖅᑐᓂ ᐊᔾᔨᒌᙱᑦᑐᓂ ᐱᒋᐊᕈᑎᒃᓴᐅᔪᓂ. ᓲᕐᓗ ᓅᕙ ᓅᕙ ᓯᑰᓯᐊᑉ ᒪᒃᒍᕆᒍ ᓴᓇᔪᓕᕆᔨᖏᑦ, ᑲᔪᓯᓂᖃᑦᑎᐊᖅᑐᒥ ᑳᓐᑐᓛᖃᓚᐅᖅᑎᓪᓗᒋᑦ ᑖᒃᑯᓇᙵ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ, ᐅᖃᐅᓯᖃᓚᐅᖅᑐᑦ ᑲᑐᔾᔨᖃᓂᕋᐃᓪᓗᑎ ᓴᓂᑭᓗᐊᕐᒥ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᓐᓂ ᐋᖅᑭᒃᓱᐃᓂᕐᒥ ᓴᓇᔪᓕᕆᓂᕐᒧᑦ ᓱᓇᒃᑯᑖᓂ ᓇᖕᒥᓂᖃᕐᓂᕐᒥ ᐃᖃᓗᓐᓂ.

ᓯᕗᒻᒧᐊᖅᐸᓪᓕᐊᓂᖅ

ᐱᕈᖅᐸᓪᓕᐊᓗᓂ ᑕᐃᔅᓱᒥᖓ ᑐᙵᕕᐅᔪᒥ, ᑲᑎᖃᑎᖃᕐᓂᕐᒥ ᒐᕙᒪᐅᔪᓂ ᐊᒻᒪ ᓇᖕᒥᓂᕆᔭᐅᔪᓂ ᑲᔪᓯᓂᖃᓯᒪᔪᖅ ᐊᒻᒪ ᐊᖏᒡᓕᒋᐊᖅᓯᒪᔪᖅ ᐃᑲᔪᖅᓱᖅᑕᐅᓪᓗᑎ ᑖᒃᑯᓄᖓ ᐅᑭᐅᖅᑕᖅᑐᒥ ᑕᐅᑐᒐᖓᑯᓐᓂ, ᒫᓐᓇᒫᖑᓚᐅᖅᑐᖅ ᓇᖕᒥᓂᖃᕐᓂᕐᒧᑦ ᐱᕙᓪᓕᐊᑎᑦᑎᓂᒃᑯᑦ ᐳᓚᕋᕆᐊᕐᓂᕐᒥ ᓄᓇᕗᒻᒥ ᐱᓕᕆᔨᐅᔪᓄᑦ ᐊᒻᒪ ᑲᑐᔾᔨᖃᑎᒌᖑᔪᓄᑦ ᓴᐃᓐᑦ ᔮᓐᔅᒧᑦ ᑲᓲᒪᖃᑎᒌᔭᖅᑐᓂᕐᒧᑦ ᐊᒻᒪ ᓇᓗᓇᐃᖅᓯᓂᕐᒧᑦ ᐱᕕᖃᕐᓂᐅᔪᓂᑦ. ᐱᒋᐊᕐᖓᕈᑎ ᓴᓇᔭᐅᓯᒪᔪᓄᑦ ᐅᖃᐅᔾᔨᔨᐅᔪᓄᑦ ᑲᑎᒪᔨᕋᓛᓄᑦ ᑲᑎᒪᓂᖅ ᑖᔅᓱᒧᖓ ᑐᑭᓯᐅᒪᖃᑎᒌᖕᓂᕐᒧᑦ ᑎᑎᕋᓕᐊᖑᓯᒪᔪᒧᑦ (MOU), ᐃᒃᓯᕙᐅᑕᖃᖅᖢᑎᒃ ᑖᒃᑯᓂᖓ ᐅᑭᐅᖅᑕᖅᑐᒥ ᑕᐅᑐᒐᖓᑯᓐᓂ, ᐱᒋᐊᖅᑎᐅᓚᐅᖅᑐᑦ ᐱᓕᕆᓂᐅᔪᒥ ᐅᐸᓗᖓᐃᔭᐅᑎᓂ ᓯᕗᒧᐊᖅᐸᓪᓕᐊᖅᓯᓂᕐᒧᑦ, ᐅᖓᓯᒃᑐᒨᖓᔪᒧᑦ ᐃᑲᔫᑎᖃᖁᓪᓗᒍ ᓇᖕᒥᓂᕆᔭᐅᔪᓄᑦ, ᓄᓇᓕᐅᔪᓄᑦ ᐊᒻᒪ ᑲᑐᔾᔨᖃᑎᒌᖑᕗᑦ ᓄᓇᕗᒻᒥ ᐊᒻᒪ ᑲᓇᑕᐅᑉ ᑲᓇᖕᓇᖓᓄᑦ ᓂᒋᐊᓃᑦᑐᓂ.

 

 

ᐅᖃᐅᓯᒃᓴᑦ